ძველ საბერძნეთში  სამართლიანობის, წესრიგის, სამართლისა და მართლმსაჯულების ქალღმერთად  თემიდა ითვლებოდა. ძველ რომში სამართლიანობის ღვთაებას- ქალღმერთ იუსტიციას - ეთაყვანებოდნენ. ორივე ქალღმერთს, ძირითადად,  ერთნაირი გარეგნობით გამოსახავდნენ ხოლმე ორივე კულტურაში. თანამედროვე მსოფლიოში სამართლიანობისა და მართლმსაჯულების სიმბოლოდ სწორედ თემიდა/იუსტიცია მიიჩნევა. სასამართლოს დარბაზებში ხშირად შეხვდებით ბერძნული ქალღმერთის მცირე გამოსახულებას ან ქანდაკებას. დააკვირდით თემიდას/იუსტიციას სურათს და სიმბოლოებს, რომლებთან ერთადაც, როგორც წესი, მას გამოსახავენ ხოლმე (მაგ.: ხმალი, ახვეული თვალები, სასწორი..). შეეცადეთ, გააანალიზოთ, როგორ უკავშირდება ეს სიმბოლოები სამართლებრივ საკითხებს და მოამზადეთ პრეზენტაცია, რომელშიც  გაანალიზებული ინფორმაციის საფუძველზე ასახავთ სამართლის პრინციპებსა და კანონის უზენაესობის ძირითად მახასიათებლებს.

ესეში/პრეზენტაციაში ხაზგასმით წარმოაჩინეთ:

• სამართლისა და კანონის უზენაესობის მახასიათებლები მათთან თემიდას სიმბოლიკის კავშირი.
• ბონუსდავალება: თქვენეული ხედვით შექმენით  სამართლიანობის ქალღმერთის ესკიზი/ლოგო/სიმბოლო, რომელშიც  სიმბოლური სახით ასახავთ სამართლისა და კანონის უზენაესობის პრინციპებს.

პრაქტიკული რჩევები კომპლექსური დავალების შესასრულებლად:

სამართლისა და კანონის უზენაესობის პრინციპების შესახებ ინფორმაციის მისაღებად გაეცანით სამართლებრივი კულტურის სახელმძღვანელოს მე-5 და მე-6 გვერდებს. 

დავალების შესრულება გაგიმარტივდებათ, თუ  ამომწურავ პასუხებს გასცემთ შემდეგ კითხვებს:

• როგორ ფიქრობთ, რატომ აქვს სამართლიანობის ქალღმერთს თვალები ახვეული? სიმბოლურად რისი გამომხატველი შეიძლება იყოს ეს?
• თქვენი აზრით, რას გამოხატავს სიმბოლურად სასწორი, რომლის ორივე თეფშიც წონასწორობის მდგომარეობაში იმყოფება? როგორ შეიძლება დავუკავშიროთ ეს სამართალს, სამართლიანობასა და კანონის უზენაესობას?
• თქვენი აზრით, რას გამოხატავს ხმალი, რომელიც სამართლიანობის ქალღმერთს უჭირავს?
• როგორ ფიქრობთ, რატომ არის სამართლიანობა და მართლმსაჯულება ქალის სახით წარმოდგენილი?
• ილუსტრაციის ანალიზის საფუძველზე ჩამოაყალიბეთ ის პრინციპები, რომლებსაც, თქვენი აზრით, კანონის უზენაესობა უნდა ემყარებოდეს.